【獨家】建抽水站一拖廿年 日嘥600萬樽食水 東涌淡水沖廁

【獨家】小學生都知道，淡水是地球珍貴資源，根據聯合國統計，目前全球逾7億人食水短缺；預計到2025年，近七成世界人口將面對水資源緊張。危機迫在眉睫，偏偏一直呼籲市民節約用水的香港水務署，帶頭「倒淡水落鹹水海」。位處海邊的東涌新市鎮，興建屋邨及私人屋苑20年來，原來一直以淡水沖廁，以該區近10萬人口計，每日沖廁用水量超過500萬公升，等同將逾600萬樽飲用水倒落海。文：葉兆臻 攝：黃文山、莊振邦、蘇文傑

配合機場計劃而發展的東涌，是本港首個在離島興建的新市鎮，區內首個公共屋邨富東邨於97年入伙。然而，這個本港最「後生」、目前人口接近10萬的新市鎮，原來20年來一直沒有鹹水供應。東涌區議員郭平憶述，「2000年逸東邨入伙嗰陣，有一次辦事處個水箱有問題，咁我自己整個水箱，發覺啲氣味有少少唔係好同，無市區嗰種鹹水味，水箱又無銹跡，咁就搵手指去試下，果然估中咗係淡水。當時諗東涌仲係起步階段，鹹水系統可能未鋪設啫！」郭平之後向水務署查詢，09年獲回覆指東涌發展區地下已敷設相關管道系統，惟擬興建的鹹水抽水站位於東涌擬填海區內，故未能提供鹹水。至於毗鄰的香港國際機場，機管局回覆本報，機場是使用鹹水沖廁；水務署則稱，機場的海水屬於「私人性質」，並非由該署提供。

相距8年後，本報上周再就「東涌新市鎮仍以淡水沖廁」的問題向水務署查詢，該署繼續重申東涌新市鎮發展區的道路下已敷設水管，供未來轉換鹹水沖廁之用。而海水沖廁系統工程項目的設計工作現正進行，該署將在設計工作接近完成時，會訂定具體時間表。

淡水沖廁一用廿年，亦非逸東邨「專利」，「我四圍去攞水辦嚟試，逸東一、二邨、富東邨、東堤灣畔……結果全部都係淡水。二十年喎，任何工程係咪都應該有短期計劃、臨時措施啊？」根據水務署統計，本港每日人均沖廁用水達96.7公升，東涌目前人口接近10萬，假設全部居民有一半時間留在家中，東涌每日沖廁用水量達到500萬公升，相等於每日將625萬枝800毫升樽裝水倒落鹹水海。

不滿鹹水沖廁致額外支出
政府用公帑買東江水，卻帶頭將食水沖廁，郭平斥做法不可接受，「你而家將香港納稅人嘅錢倒落鹹水海。唔單止嘥納稅人嘅錢，浪費我哋嘅食水資源，你仲可能要東涌居民俾額外嘅錢。佢哋以為拉一拉廁所，嗰啲係鹹水嚟。」

水費疑慮並非沒有道理，跟免費供應的鹹水不同，沖廁淡水是需要收費的。根據水務署資料，沖廁淡水每4個月結算一次，通常向大廈管理處或法團收取。使用淡水沖廁的單位，每戶4個月內首30立方米(即3萬公升)用水是免費，其後1立方米(即1,000公升)收費4.58元。水務署曾指出，目前全港約有40萬戶使用淡水沖廁，當中超過一半單位毋須繳費，其餘平均每戶每月水費不超過10元。

環團：無理由唔做好鹹水配套
儘管水費支出不算多，但全球面對缺水危機之際，珍惜食水實為應有之義。綠色力量行政總幹事文志森指，目前本港鹹水網絡覆蓋全港逾八成人口，「通常係村屋、或者唔近海嘅地區先無鹹水，但沿海嘅東涌無鹹水就比較奇怪。特別係一個新市鎮，規劃緊嘅未來人口仲會不斷增加，我睇唔到有咩理由唔做好鹹水配套。而且大家都知，香港係唔夠淡水供應嘅。」

至於以鹹水沖廁，是本港多年來的大方向，理工大學屋宇設備工程學系副教授王寧添稱，本港使用鹹水沖廁超過50年，「香港曾經制水，鹹水沖廁一直係大原則同方向，規則上，只要一個地區有鹹水供應網絡，大廈係必須用鹹水沖廁。而淡水沖廁一般只可作為臨時設施。」