Ray Online｜葉劉76歲生日　獲驚喜大型廣告應援祝「美腿常駐」

新民黨主席葉劉淑儀前兩日(8月24日)迎嚟76歲生日，佢透露今年最驚喜嘅係有支持者為佢送上大型電子應援廣告。

生日過後，葉劉喺社交網站分享各種慶生活動，包括同屋企人、各方好友以及新民黨一眾同事食飯。單係生日晚飯嘅甜品，已經食咗幾次Tiramisu。除此之外，仲有好多年輕人喺網上為佢製作二創生日卡送上祝福，佢話呢份心意令佢好感動。

應援廣告祝葉劉「美腿常駐」

講到最驚喜嘅就係生日正日，深水埗一個電腦商場同埋旺角一棟商業大廈外牆出現咗葉劉嘅大型電子應援廣告，廣告寫上「全民狂賀Regina生日快樂，美腿常駐」。葉劉話據了解係一間初創廣告公司嘅製作，原來其中一位創辦人嘅朋友係葉劉嘅支持者。所以，廣告公司採用咗幾款簡單設計嘅應援廣告，當日喺全港多部戶外同商場電子屏幕同步播放。葉劉大讚呢份應援既有心思、亦有驚喜，確實係一份非常難忘嘅生日禮物。