經民聯工程界議員卜國明托頭，似乎不敵睡魔（吳康琦攝）
行政長官李家超今日宣布香港首份五年規劃同施政報告，由於兩份文件加埋有10萬字，宣讀時間長達3個鐘。現場見到有立法會議員似乎不敵睡魔，唔小心瞓著咗。
特首今日喺立法會宣讀兩份文件嘅摘要，記者留意到坐最前排、經民聯工程界議員卜國明托頭，似乎瞓著咗。卜國明向《am730》解釋當時正細心聆聽特首宣讀文件，思考點樣將政策對接工程界。佢仲話與其關注佢嘅表情，不如一齊關注北都大學城同基建項目點樣盡快落實，仲有青龍橋工程、更換老舊水管等民生基建。
議員捽眼整鼻哥
宣讀唔夠20分鐘，航運交通界林銘鋒突然伏喺台面，身邊嘅議員見到即刻拍佢膊頭提醒。《am730》之後就捕捉到林銘鋒托住頭，低頭合上眼。林銘鋒向《am730》解釋過程中收到好多「懶人包」同埋新聞資訊，當時其實係低頭睇緊手機。由於宣讀時間頗長，在場人士難免有啲分心，鏡頭捕捉到議員劉文君捽眼；經民聯黃永威同民建聯陳克勤亦有啲「小動作」，整耳仔又整鼻哥。
ADVERTISEMENT
【👇送恆香餅家張智霖演唱會伴手禮👇】
