不論「區選夜繽紛」定「區選Halloween｣，幾乎晚晚都見到嘅曾國衞。(《am730》記者攝)
改制後嘅區議會選舉今年12月10號舉行，適逢政府推動緊海濱夜市，政制及內地事務局繼上星期嘅「區選夜繽紛」之後，今星期就應一應節將夜市攤位改成「區選Halloween」，繼續透過遊戲同專人講解宣傳投票日同制度。
噚日(28號)夜晚Ray去灣仔支持海濱藝遊坊嘅時候，又見到曾國衞喺攤檔出現喇！Ray聽佢講話前晚都已經喺度，連埋上星期民建聯梁熙話曾國衞已經留守「區選夜繽紛」兩晚，咁就幾乎晚晚都會喺海濱見到佢。佢喺檔口都唔係輕鬆㗎，事關現場都見到佢同小朋友打成一片，既同佢哋玩亦有擔當講解員角色，都真係幾忙下！
時代廣場設區議會選舉展覽
另外，政制局喺社交網站亦提到，依家喺銅鑼灣時代廣場原來有另一個宣傳區議會選舉嘅親子工作坊同展覽，柴灣青年廣場亦都會增設相關流動遊戲攤位。至於最新已報名參選區議會名單可以睇：區議會選舉2023｜地方選區及地區委員會界別最新參選名單 (持續更新)