「REACT・同行零廢生活啟動禮」今日舉行啟動禮，左起為鍾慧敏、劉祉鋒。(華懋提供)
本港近期有多項環保相關政策先後實施，社會再次關注環保議題。華懋集團最近開始舉辦「REACT・同行全民減廢」活動系列，由今個月底去到7月透過喺社區舉辦一連串源頭減廢、升級再造、資源回收等環保主題活動，鼓勵唔同年齡層一齊行動，藉親身體驗同交流獲得實用知識，再轉化做實際行動。
嘉年華一連5日免費舉行
活動系列以「REACT・同行零廢樂活嘉年華」揭開序幕，一連5日嘅嘉年華會喺荃灣如心園木化石公園免費舉行，直至勞動節(5月1號)當日。活動邀請到7個慈善團體同社企參與，節目包括圍繞源頭減廢同正確回收嘅主題市集、工作坊、遊戲攤位、街頭表演同音樂表演等。
華懋集團企業體驗總裁鍾慧敏喺今日(28號)舉行嘅啟動禮致辭就話，大家今日為咗環境作出生活習慣嘅微細改變，都會聚沙成塔改變世界、影響未來，哪怕只係用少一隻叉。綠惜地球創辦人及總幹事劉祉鋒就期望，今次同華懋嘅合作可以為本地減廢回收帶嚟正面影響，啟發大家實踐「綠惜生活」。