亮叔(中)同一眾嘉賓大合照，對答反應仲好快。(《am730》攝)
今時今日小黃鴨人人愛，原來75年前由本地實業家林亮設計及生產嘅小黃鴨，先係香港第一代小黃鴨，仲係香港第一件塑膠玩具，當年開啟咗香港晉身世界第一玩具生產基地的黃金盛世，陪伴好多代香港人成長。虎父無犬子，亮叔創造玩具製造嘅傳奇，而佢大仔就係政界猛人兼行會成員、經民聯副主席林健鋒喇。
亮叔親自傳授長壽秘訣
出年100歲嘅林亮老當益壯，當年白手興家創辦永和實業，被譽為「小黃鴨之父」。中環街市今年聖誕就特別推出「LT DUCK好玩得」藝術展覽，慶祝亮叔100歲壽辰，今晚(6號)更難得聯同大仔林健鋒、長孫林凱章三代同堂主持開幕禮，同框大合照嘅嘉賓仲有巿建局行政總監韋志成、發展局局長甯漢豪、華懋集團執行董事兼行政總裁蔡宏興等。
亮叔全晚笑容可掬、對答反應快，韋志成致辭時亦大讚亮叔有種令人開心嘅氣場，先至能夠創作出令人開心嘅小黃鴨。亮叔就同Ray分享長壽秘訣，首要係唔能夠經常鬧人、要保持心平氣和，就算被人鬧都最好忍讓啲，仲話心境開朗自然身體好，皮膚都會好。聽君一席話，亮叔話齋，袋咗錢落袋了。