樂聚維港嘉年華包括有水上煙火特效嘅「幻彩詠香江」。(資料圖片／蘇文傑攝)
話咁快呢個月周末傍晚時分喺灣仔對開維港舉行嘅「樂聚維港嘉年華」(Harbour Chill Carnival)，又嚟到活動嘅尾聲。喺過去活動舉行嘅日子，夜晚維港都會上演有水上煙火特效嘅加強版「幻彩詠香江」。活動主辦機構旅發局提大家喺今晚(30號)、下星期六同日(8月5及6號)嘉年華最後3日，都會繼續提供唔同娛樂節目。
「HK」字樣煙花第一秒出現
旅發局話，夜晚8點準時上演、有水上煙火特效嘅「幻彩詠香江」深受市民同旅客歡迎，唔少人都提早去到灣仔海濱「霸定靚位」近距離觀賞。如果想影到煙水特效嘅「HK」字樣，旅發局就提醒要預早準備好相機等待，因為「HK」喺煙火第一秒就會出現！佢哋又話，成個煙花表演持續10分鐘，而最後3分鐘就係另一個高潮所在，所以記得睇到最後。
至於邊度睇煙花最好？旅發局就提大家，可以由港鐵會展站A2出口出站，然後順住維港嘉年華嘅指示牌一路前行，就可以去到達海濱長廊，而現場嘅工作人員亦都會解答邊度睇到煙花。不過Ray噚晚(29日)經過現場，就見到有駕駛者臨入紅隧突然喺慢線停車睇煙花，後面部車差啲收唔切掣釀成交通意外，要睇煙花就記得跟旅發局推介喇！
▼水上煙火特效及維港水上音樂會▼
維港水上音樂會今晚主題「廣東流行匯」
另外，旅發局話喺煙花以外，嘉年華亦有嚟自唔同國家人士嘅街頭表演、令人睇到心跳加速嘅極限運動表演，以及多元音樂嘅維港水上音樂會。音樂會今晚繼續以「廣東流行匯」為題，請到陳葦璇、JNYBeatz、陳健安及周國賢本地唱手，而下星期就係「電音狂熱」主題，請到泰國新生代歌手 TYTAN、南韓 Rapper Reddy、超強R&B創作女聲Karencici及本港歌手Tyson Yoshi等，呼籲拎咗飛嘅觀眾記得提早到場！