Ray Online｜「洪門宴」下台徐英偉：人生充滿挫折　讀書經常不及格

前民政事務局局長徐英偉去年初疫情期間，因為出席前港區人大代表洪為民嘅生日宴，引起風波並且辭職落台。佢近日接受恒生大學傳播學院訪問，被問到點樣面對挫折同爬返起身，徐英偉話其實唔使面對，要預咗有挫折先。佢更加話自己嘅人生充滿挫折，例如讀書成日唔及格，不過重點係要識得向前望。佢仲分享人生大道理，認為一個完美嘅人先係最唔完美，因為世界不斷轉變嗰陣，人生亦要不斷碰撞，先會學識下次做好啲。

徐英偉：有得揀都唔想揀輸入外勞

徐英偉依家重新出發，已經有新崗位，就係作為酒店業主聯會執行總幹事。佢當然好關注業內人手不足問題，佢話本港酒店大約有8.9萬間房，大約有3、4萬勞動人口從事酒店業工作，但估計目前仍然爭9,000人。佢解釋，旅遊業復甦速度較預期慢嘅主因係人口老化，以及唔同行業惡性循環咁搶人，令酒店業人手嚴重不足。佢話現時訪港旅客數量只係回復疫情前6、7成，如果到完全恢復至疫前水平，相信業界人手會頂唔住。不過，徐英偉強調有得揀都唔想揀輸入外勞，因為請本地人可以做10幾年咁話呀。