盧寵茂喺開幕禮話自己喺南區住咗超過40年，台下觀眾即刻「嘩」一聲。(羅庸軒攝)
醫務衞生局局長盧寵茂加入政府之前，都有喺南區嘅瑪麗醫院做肝臟移植中心主任。佢今日(25日)喺南區地區康健中心開幕典禮致辭嗰時，自爆原來都係一個南區人，前前後後喺南區住咗超過40年，台下嘉賓即刻「嘩」一聲，之後更加話自己期間曾經「試圖離開南區」，最後發覺唔得，都係要返嚟南區住。
盧寵茂提到，不論佢結婚之後第一層喺置富買嘅樓，抑或碧瑤灣、貝沙灣，佢都喺南區住咗好多年。佢仲話自己成日去香港仔同黃竹坑，特別鍾意香港仔啲街坊同茶餐廳、麵包舖等小店嘅一份親切感，「去買嘢都畀到隔籬鄰舍感覺。」隨住南區地區康健中心正式開幕，盧寵茂形容對南區非常重要、為居民提供咗健康指南，希望中心日後可以幫南區居民做得更好。
致辭期間換咪「最緊要聽到我講乜」
另外，盧寵茂致辭期間仲有一個小插曲，因為佢講嘢支咪有干擾，所以講到一半就有攝影師想佢換另一隻咪。盧寵茂即刻換咪，仲話呢個提議非常之好，「最緊要聽到我講乜！」
