Ray Online｜經民聯花車在多區巡遊團拜，陸瀚民生仔會獲黨內「貼多」4萬元。(陳芷晴攝)
今日係大年初六，經民聯舉辦花車巡遊團拜活動，去黃埔、中環、大埔等等向市民拜年。經民聯話祝全港市民龍年行大運，香港經濟民生開創新氣象。 經民聯仲鼓勵市民生育，提到如果黨內立法會議員陸瀚民成事嘅話，除咗政府嘅2萬蚊新生嬰兒獎勵金，黨內仲會貼多4萬啊！
即睇經民聯巡遊團拜盛況：
陸瀚民致辭嗰陣話希望做生意嘅朋友，喺經濟復甦下愈賺愈多，生多幾個。佢嘅祝福即刻引起黨友嘅注意，你一句我一句咁祝佢生「龍女」、「龍仔」，話生龍鳳胎都得㗎！
經民聯主席盧偉國落區嗰陣，用拿手嘅色士風表演《財神到》，而側邊嘅經民聯南區區議員趙式浩就打扮成財神，見到佢滿頭大汗啊。盧偉國祝市民六六大順，期待政府嚟緊公布嘅財政預算案會落實經民聯建議，為樓市撤辣，股市方面就加強投資信心。