議員洪雯指有心理準備被嘲笑口音，惟不滿大報形容為「米線阿姐口音」
立法會組成五光十色，當中有嚟自內地背景嘅議員。選舉委員會界別議員洪雯就係其中之一，不過佢今日發出聲明，批評「本港大報」《星島日報》形容佢講嘢係「米線阿姐式」口音。
事關星島今日刊登一篇政情新聞，介紹立法會將會利用智慧謄錄系統「智識聽」推出實時字幕。報道提到科大訊飛董事長劉慶峰喺唔同場合都推介「智識聽」，話就算係極唔標準嘅廣東話都冇問題，仲用議員洪雯做例子。報道形容無論係「米線阿姐式」口音，抑或「明張目膽」用錯成語被修正，實時字幕有助公眾更好理解會議內容。
認為說法不尊重基層勞動者
不過，洪雯唔係好滿意報道，喺聲明中話作為議員，有心理準備畀「無聊人」嘲笑口音。但佢唔滿意星島作為本港大報，幾次咁樣嘅講法令佢好遺憾，好唔尊重基層勞動者。「米線阿姐不願躺平等福利、自食其力，值得我們尊敬。沒有了米線阿姐那樣的人，香港如何運轉？」
