中華廚藝學院學生當日會表演動感手工拉麵。(職訓局提供)
港府喺疫情後推出「開心香港」活動，為市民帶嚟多元化同樂活動。職業訓練局(VTC)今個月22號將會喺西九文化區舉辦VTC「玩轉技能」嘉年華，到時4個特色主題區，包括時裝及文化區「Art Like天地」、運動與健康區「智Fit挑戰站」、廚藝示範區「星級料理坊」以及人寵共樂嘅「寵物．童．學會」區域，夾埋將會有超過30項表演同攤位活動，畀市民免費入場享樂。
攤位教金屬線編織、製作書簽
VTC話，香港知專設計學院(HKDI)嘅學生除咗會喺舞台Busking同唱歌之外，亦會着上近50件分別由HKDI同香港高等教育科技學院(THEi高科院)、青年學院學生設計嘅「玩樂」主題時裝。中華廚藝學院同國際廚藝學院嘅學生，到時亦會分別喺台上表演動感手工拉麵同即場製作玫瑰花、可愛小熊等造型嘅柔韌粘土狀翻糖。
當日除咗食物之外，VTC話學生亦會擺攤位，教授金屬線編織工藝、製作中式服裝書簽，以及善用牛仔布碎再造成布藝杯墊。活動當日朝早10點至傍晚6點喺西九文化區海濱草坪舉行，VTC話今次係「開心香港」活動之一，仲獲得教育局支持，希望一家大細同三五知己可以到場，度過一個有意義嘅星期日。
