Ray Online｜陳勇再爭取中央向港送大熊貓　指「唔會扭計拒絕落場」

民建聯4大工作目標係「提升自我、建設香港、報效國家、聯通世界」，負責「報效國家」事務嘅副主席陳勇，再次爭取中央向香港送大熊貓，話大熊貓係世界頂級親善大使，「唔會扭計拒絕落場、唔會擰歪面」，可以幫手講好中國同香港故事。

負責「報效國家」同「聯通世界」事務嘅副主席陳勇同周浩鼎，今日喺傳媒茶聚分享工作重點。陳勇話人才係一代比一代強，而熊貓都需要新世代，因為依家香港嘅兩隻大熊貓年事已高，唔係成日當值到親善大使。前排全國兩會，陳勇話有向有關方面反映再送大熊貓嚟香港，佢話感覺上向利好方面發展，不過大熊貓唔係普通遊客，買張飛就可以聽日過嚟，要安頓好唔好餓瘦國寶。

民建聯會舉行區區有中醫活動

今年係國家成立75周年，陳勇話將會舉辦多場高端論壇，包括探討加快大灣區建設，內容涉及北部都會區、中醫藥界、綠色生態產業鏈、愛國主義等。活動方面，民建聯亦會推出「社區影院2024：愛國電影巡禮」同18區「區區有中醫」活動等。

「聯通世界」工作上，周浩鼎話會繼續同本地嘅外國商會緊密溝通，亦計劃出去識新朋友，會去東盟、中東或者一帶一路沿線國家同地區進行民間交流，講好香港故事同協助促進香港經濟。