何應富(中)今日首次主持消委會記者會。(鍾式明攝)
消委會上一任總幹事黃鳳嫺上禮拜二(6號)已經約滿離任，總幹事一職暫時就由副總幹事何應富署任。何應富今日就第一次主持《選擇》月刊記者會，佢會後話對佢嚟講呢次都係新挑戰嚟，又話背後有團隊支援，令佢可以應對到大家嘅提問，希望可以畀到足夠資訊消費者。
時機成熟將公布新人選
消委會嚿年年底開始招聘總幹事，到依家都仲未有新人上任，係唔係招聘有困難？何應富就話，目前仍然繼續招聘緊，中間有一定嘅程序同步驟要完成，唔係過程有困難，當時機成熟就會向外公布新總幹事人選。
喺消委會擔任總幹事超過12年嘅黃鳳嫺，早前透露退休後會先稍作休息，擁抱較從容嘅生活節奏同為生活增添新姿彩，幫身心靈叉叉電。黃鳳嫺今年年初被問到係咪會離任嘅時候，話招聘程序已經開始，由於有潛在利益衝突所以不便評論，但就反問記者「你又覺得我會離任？」
立即更新/下載AM730手機APP 體驗升級功能
