楊雪盈(中)、顧國慧(左二)同執到路牌嘅街坊，今日去路政署還返塊路牌。(楊雪盈FB)
連日世紀暴雨除咗水浸之外，有舊式T字路牌懷疑都被暴雨沖甩。銅鑼灣大坑道近銅鑼灣道交界一個「大坑道」T形路牌，喺上星期超強颱風襲港之後已經甩甩地，灣仔區議會前主席、灣仔大坑選區前區議員楊雪盈日前就喺社交網站話，塊路牌最終都頂唔順跌咗落嚟，由於嗰時兵荒馬亂，所以呼籲街坊可以留起個路牌先。
最想T字路牌可以原址重置
事隔3日，楊雪盈就再發帖，話佢同灣仔軒尼詩選區議員顧國慧今日(11日)已經陪執到路牌嘅街坊，去到北角路政署交還返塊路牌，又引述路政署負責人講塊路牌好有價值，將會參考古物古蹟辦事處意見，決定點樣處置塊路牌。
楊雪盈同顧國慧就話，最好梗係可以原址重置，「呢樣就靠大家一齊monitor(監察)啦」，仲話今次事件之後真係再一次覺得「大坑世一」，又慶幸路牌冇畀暴雨沖走。
大坑道近銅鑼灣道一塊T字路牌，喺暴雨來臨之後已經沖甩咗。(楊雪盈FB)
