疫情｜健身中心生意一鋪清零 嘆防疫抗疫基金杯水車薪

新冠肺炎疫情失控，全港健身中心等表列處所，又再陷入停業困境。港府早前預告現行社交距離措施屆滿後，「絕對沒條件放鬆」，甚至正研究進一步如何收緊，令業界雪上加霜。政府雖再推出「防疫抗疫基金」措施作支援，但有大型健身中心指，在疫情下重開遙遙無期，惟每月營運開支高達300至400萬元，即使是發放最高一次性20萬元津貼，明顯是杯水車薪。有健身教練表示，疫情下手停口停，惟政府申請補貼門檻甚高，若沒有透過總會註冊，便難以獲得1萬元資助，令業界十分徬徨。有經濟學者指出，若政府無力防控疫情，業界倒閉潮陸續有來。

採訪：專題組

第五波疫情爆發以來愈趨嚴峻，健身中心再度被勒令停業。大型健身中心Waterfall會所經理Patrick向本報表示，公司在奧運及太古均設有健身中心，分別佔地超過10,000平方米；而每間中心月租過百萬元，加上各有約80名全職員工，連同其他營運開支，粗略估算，每間健身中心每月支出，至少達300至400萬元。

靠儲備資金盡量保員工生計

「原本我哋上年復業，生意同人流有慢慢恢復，由最初重開回復五成，到上年12月有返七成人流。但到今年初疫情又再嚴重咗，政府突然一刀切話全部要停業，生意就一舖『清零』。」他慨嘆，由2020年疫情開始至現在，中心已曾停業超過200多天。在沒有收入下，公司唯有拿出儲備資金，盡量保著員工生計，「但當個個月蝕幾百萬，如果仲要停業5、6個月，恐怕就真係好難支撐。」

Patrick又指，現時政府提供第六輪防疫基金資助，由於只會按其處所面積，分為兩個資助級別，包括500平方米或以下為10萬元資助；以及500平方米以上為20萬元資助。相關金額對其中心而言，實在顯得杯水車薪。他說:「對於細嘅健身中心，呢筆錢或者可以勉強維持到短時間『吊鹽水』。但對於我哋大型健身中心，就真係仲差好遠，租都唔夠交。食肆明明都可以劃分5個處所面積去派發資助，點解我哋就得兩個資助級別？真係好難理解。」

盼「保就業」援助具針對性

他又希望，政府可再推行「保就業」計劃，透過向僱主提供財政支援，以支付員工薪金，「亦都希望政府撥款可以有針對性啲，上次明明有啲大公司都賺緊錢，但都照申請『保就業』資助，覺得啲錢唔係用得其所囉。」

疫情下健身中心被停業，打工作最擔心當然是飯碗不保。Waterfall健身經理阿Don指，公司雖如常出糧，但由於中心的健身教練底薪只佔收入一成，其餘九成收入來自教學，平時亦是多勞多得，停業期間無班可教，人工自然大縮水，「以前可以有8至10堂一日，依家一星期上得4至5堂，好多時仲係睇下戶外公園係咪可以訓練，情況當然好唔理想。」

更雪上加霜的是，阿Don表示，在防疫基金上，政府只認可港協暨奧委會轄下體育總會的旗下註冊教練，才可獲取1萬元資助，他認為相關門檻十分不合理。「嗰張名單的確係有90幾間體育會，但只有中國香港體適能總會(PFA)係適用於健身教練。健身業界明明有5至6間認可嘅發牌健身教育機構，有部分健身教育機構亦得到持續進修基金及國際健身教育機構認可，我哋亦未必個個會係考PFA，點解只限於嗰間會嘅教練，先可以拎到1萬蚊？好多教練可能真係等住呢1萬蚊救命架喎。」

教練稱網上教學難長遠

阿Don表示，現時會隔天聯絡客人，了解他們的情況，鼓勵他們保持運動的習慣，而中心亦會嘗試使用網上教學，但相信不會是長遠做法。「食肆都可以做到夜晚6點堂食，2人一組，社交距離維持1.5米，經常消毒，打針先入去處所呢啲，其實我哋通通可以做到，唔明點解我哋唔開得。」他指出，公司願意配合政府新措施，不介意接受短暫痛楚，但如果一直停業仍無助遏止疫情，業界會非常憂慮。

浸會大學榮休經濟系副教授巫伯雄分析稱，要令經濟好轉，如何防控疫情才是癥結所在。「防疫基金只係延緩各行業惡化情況，暫時令到佢哋唔結業。但愈拖得長，資本少嘅公司始終都係會捱唔住，之後會再蔓延至大型公司。到底係咪要谷針之後放寬啲措施？呢個係政府要思考嘅問題。」