有葉劉粉絲將應援物同之前嘅手幅合照。(網民Sup Sup@FB群組「我老公娶咗葉劉導致婚姻破裂關注組」)
行政會議成員、新民黨主席葉劉淑儀今日75歲大壽，由葉太支持者組成嘅「我老公娶咗葉劉導致婚姻破裂關注組」下晝自發喺銅鑼灣街頭，幫葉太舉行生日應援活動，大派約500塊眼鏡布應援物，場面十分墟冚，關注組更戲言要好似「姜濤灣」咁，將銅鑼灣變成「葉劉灣」。
應援物40分鐘派晒
活動今日下晝4點半喺記利佐治街舉行，開始之前已經有市民聚集等候拎應援物，期間有幾名便衣警員在場觀察。活動正式開始嘅時候場面一度混亂，關注組要安排市民排隊逐一領取眼鏡布應援物。據報，關注組今次用咗約700元製作約500塊眼鏡布，大約40分鐘已經派晒，形容市民反應好踴躍。
葉太夜晚就喺社交平台發文回應，話好多謝呢批年輕人一直以嚟嘅支持，特別係佢哋之前已經參加過讀者交流會，今日更加為佢舉辦生日應援活動，現場亦有唔少途人即場送上祝福，令佢非常感動。佢再一次感謝各方好友送上海量祝福，話大家嘅心意同支持，令佢今年生日倍添意義。佢回覆傳媒查詢嘅時候亦提到，因為自己唔想太過高調，所以冇現身銅鑼灣。
ADVERTISEMENT
