鄧炳強踩過界入旅遊展介紹「今期最紅」，稱沙頭角是熱門之選。(FB@鄧炳強 Tang Ping Keung)
一連4天嘅「香港旅遊博覽會」正式開幕，除咗有唔少外地旅遊地點推介，原來仲有本地遊節目推介。保安局局長鄧炳強更加踩過界，化身「旅遊大使」喺Facebook推介沙頭角，更加大讚係熱門兼「今期最紅」。
鄧炳強踩過界入旅遊展：
鄧炳強趁開幕率先支持
鄧炳強喺Facebook出Post表示，自從沙頭角開放個人遊之後，有好多市民都專登申請自由行禁區紙，去探索呢個地方。佢話沙頭角唔止成為咗本地遊熱門之選，今年仲獲邀走埋入旅遊展，所以今日開幕就率先去到攤位支持吓。
局長話，今次攤位除咗介紹沙頭角三個「十大」外，仲有好靚嘅打卡位，佢仲特別喺許願牌上留低問題，俾嚟到嘅市民發掘，又話如果大家嚟到現場答啱問題，就可以獲得一個許願牌掛上許願牆，仲叫市民入去嘅話順便揾下佢留低嘅問題喎！
局長又補充，佢嘅同事仲會現場幫大家申請網上禁區紙，咁就可以方便去沙頭角喇，並夾可以係攤位打卡同埋換領限量禮品㖭。