歐聯激戰｜死亡B組3活1 AC求挫利物浦創奇蹟

歐聯分組賽今晚起展開最後一輪，先上演Ａ至Ｄ組賽事，其中以B組形勢最緊湊，除利物浦篤定首名，其餘3隊均有機會爭逐次名晉級。當中上輪絕境逢生的意甲榜首AC米蘭，將在聖西路主場恭迎紅軍(08/12 04:00)，在「神鋒」伊巴謙莫域等主力復出下，求創奇蹟闖關。

B組利物浦以5戰全勝15分排榜首，篤定首名出線。波圖5分排次名，今輪只要主場擊敗得4分排榜尾的馬德里體育會，即可次名晉級。「紅黑兵團」AC米蘭亦暫得4分，但憑較佳得失球壓過馬體會排第3，今場要贏波，並寄望波圖失分，才可闖入歐聯16強。

紅黑兵團首循環作客利物浦半場領先下被反勝3比2，今場復仇不容易，主帥派奧利為求創奇蹟，特意在上輪意甲對沙蘭力坦拿時，收起伊巴謙莫域與辛度東拿利等半數正選，留力今場強陣出戰；但球隊仍面對傷兵難題，包括後防重心卡積亞因腿肌腱受傷接受手術需休戰半年，同時列比錫及基奧特等亦在養傷，近期失寵的隊長中堅阿利斯奧羅馬洛尼將會復任正選，力抗紅軍。

利物浦方面，近期在各項賽事錄得5連勝，但球隊既已鎖定出線資格，更要為下場英超迎戰阿士東維拉主帥謝拉特的倒戈，今場或留力。據報包括剛戰英超一腳射破狼隊大門制勝的奧歷治，將與南野拓實、阿歷士張伯倫等「副選」齊齊擔正，戰力稍減，但相信球員會努力博表現，或有意外驚喜。