Ian表示很享受今次演出，因為自己甚少唱爵士樂。（娛樂組攝）
陳卓賢（Ian）昨日（8日）到西九出席《自由爵士音樂節 2025》，一連兩場的演出吸引大批Hellosss支持。Ian在第二場演出更額外清唱多首自己的歌曲。Ian表示今次的演出，令他覺得跟Hellosss的距離好近，很想跟他們傾偈，而且唱到很多自己喜歡的爵士樂。
他說：「我覺得今次幾好玩，因為可以唱到好多平時唔會唱嘅歌，自己開show都未必會有一part唱呢類型嘅歌。自己細個成日聽呢啲歌，我就覺得好好玩。呢啲歌去到今時今日都會覺得好Hit，唔會覺得話係一個上世紀嘅歌。」
提到不少歌迷叫他快些開騷及出碟，Ian表示會努力向公司極力爭取。他說：「公司都有問嚟緊有冇目標或者諗法，我當然係極力爭取（開騷），但係我想開騷之前可以出一隻大碟，我依家唔夠新歌，排唔到一個全新嘅主題或者故事，我就覺得唔係好夠誠意。我係想有好多新歌，排到新嘅故事主題、有新嘅畫面呈現俾大家，係我想做嘅嘢多啲。開騷之前可以出一隻大碟會比較緊要啲，至少起碼要寫10首歌。」問到公司有沒有甚麼表示，他稱暫時沒有甚麼feedback。
Ian在音樂會上以「努力爭取中」回應歌迷提出開騷的要求。（娛樂組攝）
由於Ian的腳傷未癒，所以今次可以坐低唱歌特別舒服。他提到早前拍《DNA is U》MV，Ian指當時成隻腳都腫得好緊要，所以有很多動作都要就住，坦言自己如果不是腳痛，會跳得再好些。他指稍後MIRROR都要有各式各樣的練習，所以自己會包紮好才練舞。
Ian與Jer從來都不是跳舞高手，因此今次二人獲企C位，Ian笑謂終於捱出頭來。他表示今次二人一同獲企C位不感意外，因為他與Jer昔日都被排舞師當是「左右門神」，二人永遠都是一對，只要見到Jer企左後排，自己便會自動去右後排。對於有網民不滿個別成員獲得的大特寫比較多，Ian指這首是團歌，應該要留意多些他們一團人的畫面。
