要購得林日曦的加場門票，便要與MIRROR的粉絲一齊爭上網。
MIRROR演唱會明日(31日)開售，同日亦有林日曦的舞台獨腳戲《大初戀日》加場門票發售。由於林日曦的獨腳戲同樣大受歡迎，相信明天的售票網會超級大塞車。林日曦對於有人問道為何會與MIRROR的同日賣飛，他說︰「因為唔係我選擇，係售票網分配俾我。至於有人竟然問我可唔可以推遲啲……唔好阻住佢買Mirror飛……」他用短片告之大家答案。
林日曦在片中說︰「有啲人係咁留言，話我點解要同MIRROR同一日開賣，就叫我『唔該你可唔可以推遲啲』。我心諗，首先第一，如果你淨係買MIRROR，唔買我嘅飛，咁我幾時開賣關你咩事。如果你淨係買我嘅飛，唔買MIRROR飛，咁佢哋幾時開賣又關你乜事。如果你兩個都唔買，咁更加唔關你事啦。如果你兩個都買嘅話，咁你過嚟買咗先啦，因為嗰邊你係買唔到㗎喇！或者你可以買咗嗰邊先，因為呢邊應該好晏都仲有飛賣嘅……」