議員指上京學習比大學上課嚴格，周浩鼎表示恐令公眾誤會抗拒學習
立法會議員正喺北京國家行政學院參加研習班，由於有「閉環管理」等規矩，有議員形容應該嚴格過大學上堂。民建聯議員周浩鼎認為呢種評論，會令公眾誤會議員抗拒學習。
據了解議員只可以喺學院活動，唔可以私自外出。未經授權唔可以接受訪問，或者喺社交平台發布行程內容，上堂期間一度要收手機。噚日有報章政情專欄引述有不具名議員笑言，考察行程每日都好刻苦，形容應該嚴格過大學上堂。
相信議員認真學習
周浩鼎就喺社交平台發文，話今次研習班係非常嚴肅嘅項目。作為學院學員，嚴格按照學院紀律上堂係最基本嘅要求。佢留意到有不具名議員形容學習嚴格過大學上堂，佢話恐防會令公眾誤會議員抗拒學習。周浩鼎強調議員今次有幸參加研習班，相信都係帶住履職盡責、認真學習嘅態度，希望藉此幫到未來嘅立法會工作。
ADVERTISEMENT
【免費暑假親子活動👨👩👧👦送挪亞方舟親子門券及10個遊戲代幣】
