Ray Online｜瑞典駐港領事搭開篷巴賞美景　體驗「山道過山車」

搭開篷觀光巴士係近年訪港旅客熱門行程之一，瑞典駐港澳總領事貝樂儀最近都成為座上客，欣賞咗港島沿岸美景。貝樂儀話，喺一個鐘嘅車程入面，一次過欣賞到香港嘅大自然、文化同城市生活，不禁感歎香港真係好靚、好特別。

貝樂儀搭開篷觀光巴士去到山道天橋舉高雙手，好似真係坐緊過山車咁。(瑞典駐港總領事館影片截圖)

想去海洋公園探家姐細佬

瑞典駐港總領事館喺社交平台，發布貝樂儀搭城巴開篷觀光巴士H4線嘅相同影片，見到佢即使坐上層畀太陽曬住，仍然好享受車外風景。領事館引述貝樂儀話，沿路欣賞咗翠綠嘅大自然、淺水灣嘅海灘，仲經過咗好多地標，例如歷史悠久嘅薄扶林村同香港大學。H4線都會經過海洋公園，佢就提到都好想去探下熊貓家姐同細佬喎！

H4線其中一個賣點，就係近年深受香港人同旅客歡迎嘅山道天橋段。貝樂儀喺體驗傳說中「山道過山車」嘅時候，更加舉高雙手，好似真係坐緊過山車咁，事後形容喺高樓大廈之間穿梭，真係香港獨有嘅體驗。帖文最後更提到，作為瑞典總領事嘅貝樂儀，原來平時喺街都好鍾意留意富豪(Volvo)、斯堪尼亞(Scania)呢啲瑞典品牌嘅巴士，遊車河都不忘幫瑞自家典品牌賣廣告。