一年一度E3又開始，土下座又要老土講句不知不覺又一年。2015年開始傳出消息嘅《FINAL FANTASY VII REMAKE》一直都係唔少人心目中期待大作，今年E3終於正式宣布明年3月上市，唔使等到你個孫出世先有得玩啦！先講暫時仲有嘅疑問，呢幾年間官方都多次用唔同渠道講《FF7REMAKE》唔會係一隻game搞得掂嘅事，最有可能係三部曲，亦有可能係DLC分拆章節，但一直都冇答案，上個月製作人野村哲也仍然講遊戲唔會係一次就可以推出，不過，直到今次官方發表，似乎都冇為「到底係咪分三部曲？」呢件事解話，認真奇怪。《FF7》能受玩家喜愛，好大可能係因為故事：主角見到自己喜歡嘅世界，就快被掌控世界資源嘅大企業搞死，所以就算獨力反抗，都要為自由同未來推倒強權，寧死都不向惡勢力而屈服。呢啲精神同想法，係咪令大家好有共鳴？
