上回講到《任天堂LABO》偷跑索炒，出稿後一日價錢已回番去六百幾蚊，但似乎都同定價有一定距離，講到尾物以罕為貴。不過，題外話一句，有人質疑土下座，「你唔知頭唔知路唔好亂講啦！炒價關偷跑咩事呀！」乜原來唔係做緊呢行生意嘅，反而會清楚過做緊嘅人？觀乎行家最多談論嘅，就係點解有行貨都唔夠貨賣，傳聞就話因為行版有九成貨都返咗大陸，所以搞到香港得番一成唔夠派，亦有指無論咩貨都好，今次《任天堂LABO》都真係又重又大盒，來貨價特別係水貨，真係冇可能定得好平，所以有啲大戶今次都冇重手返貨，利潤唔高又麻煩，真係賣過就算。點都好，都只係傳聞，唔一定係事實，所以唔係應承咗講多期都唔會寫，下次都係輕輕鬆鬆講番遊戲啦。