別踐踏別人的快樂

《12怪盜》上畫以來評語兩極，一係踩套戲垃圾，一係讚12子靚仔、搞笑又好睇。我覺得呢個現象帶出流行文化非常重要嘅課題：目標群眾。流行文化，係講「絕大部分人」嘅事，但隨著碎片化先係流行，變得必須有特定對象。香港歷史上有冇一套電影評價咁極端？主要嘅原因係：把尺唔同。

乜嘢係垃圾電影呢？眼高手低，睇完唔知講乜。《12怪盜》故仔易明，我唔會用「垃圾」來形容，但確係一張紙可以寫完嘅故仔。你可以話佢劇情單薄，但因為咁，就上綱上線講到又垃圾又呃粉絲錢，明顯係對人唔對事。

至於粉絲睇得開心，我覺得主要係因為「難得」。難得12子參演一部電影，戲份相對平均，有飛車有爆破，動作場面亦都好睇，極多inside joke，牽動到對MIRROR嘅感情聯繫。

有人話Makerville用盡鏡仔拍垃圾，批評公司為賺錢冇心做好作品，如果真係咁，應該係乜鬼都交行貨。但提提大家，Makerville第一部電影係《命案》，攞咗「電影評論學會」嘅最佳電影；佢哋亦有出品《那年盛夏我們綻放如花》、《瑪嘉烈與大衛》；俾機會Mike導超支去非洲拍森林、用心做嘅《公司冇逼我跑馬拉松》、鏡仔嘅MV亦愈嚟愈抌本。平心而論，Makerville嘅作品，有啲有誠意，有啲無厘頭，都係推動緊不同嘅流行文化，做到百花齊放。無論你鍾唔鍾意，呢個年代唔交行貨，追求百花齊放，仲唔係難得？

分享個「路邊社」消息，點解《12怪盜》會用新導演？聽聞佢哋原本都想搵有經驗嘅導演，但得到嘅反應全部係：要求12子戲份平均係冇可能嘅事，《Ocean’s 11》其實都係得兩三個主角，其他係配角。亦有導演推嘅原因係，套戲好啲人只會讚MIRROR，套戲唔好就一定唔關MIRROR事，係導演問題，呢啲有輸冇贏嘅局，一個有經驗嘅外人點會肯頂？

一套冇乜外地市場，專心服務香港人嘅「粉絲向」電影，即使唔係勁好睇，但我無資格批評人哋嘅快樂，因為套電影同時係一封難得嘅情信。