網劇《反黑》導演為拍續集而發起網上眾籌，目標係400萬，平台開放咗3日，有47人響應捐咗3萬幾蚊，但眾籌項目突然取消咗，連導演呼籲大家捐錢條片都下埋架，原因不明。
《反黑》2017年播出時反應唔錯，仲係首部登上Netflix嘅港產網劇，被譽為「港片之光」。時隔8年，眾籌同輿論反應都不似預期，我覺得有三點值得思考。
一：Netflix只係一個平台，唔係指標。Netflix有冇好嘢睇？一定有，但上Netflix就等於係好作品，就一定錯，試吓上Netflix睇下有咩港產作品就會明。所有平台都會用一種叫「打包」嘅方法，即係好片之外，亦會搭單有啲好平嘅製作，令平台平均成本降低，做靚條數，同時提高觀眾停留喺平台嘅時間。所以迷信上到Netflix就一定好，完全係貪慕虛榮愛名牌嘅錯誤邏輯 。
二：導演話拍攝續集係佢「一直以來最大的心願」，唔知點解，世人總會將娛樂圈內一切行為美化為「追夢」，而冇配合呢啲行為嘅單位，就會被指責係「扼殺夢想」。換個例子，有人自小就想做隧道收費員，又唔會有人批評自動收費系統出現，係扼殺咗佢夢想。追夢係好浪漫嘅事，但因為一個浪漫假象而去強求，究竟係邊個嘅錯？
三：以上兩點都唔係要抹殺劇集嘅價值，相反喺而家呢個電影業寒冬，劇集令好多製作人及演員有嘢做，能力不至於生鏽，更加唔會因為消失於幕前，而令觀眾唔記得你。新人有機會，先至會有將來嘅大導演大明星。
自資劇集、外判節目隨著Viu TV開台以來成為新趨勢，起初大家焦點係成本，經過幾年以來多部好作品嘅驗證，外判製作嘅意義遠大於節省成本，而喺班底及創作上，都提供更大空間同彈性，同時擴闊觀眾嘅選擇。今時今日仲係行業嘅低潮，成為好多人嘅救命稻草。