90後旅行及信用卡KOL小斯，用差不多1.4億購入北角豪宅特色單位，成交價同呎價均創該豪宅新高。逆市高價入市聯乘年輕人向上流嘅勵志故事，迅速被網民洗版，KOL有如此強大嘅吸金力，亦令好多人震驚。我覺得外界反應反映咗兩個問題︰
第一：想法過時。過億豪宅成交成日都有，由歌手影星持有亦唔係新鮮事，今次被廣泛討論，因為買家係KOL。似乎大家仲係停留於「明星一定好搵，KOL就一定細雞」呢個時代，覺得KOL都係飲飲食食、化妝扮靚，買得起太古城都已好叻。但事實上，近年KOL發展唔少都好過好多明星，明星要養一大班梳化服經理人團隊，拍個廣告下下講緊收七位數，好多品牌就算想搵都冇能力；KOL經營成本低好多，即使冇明星收咁貴，但可以密食當三番之下，低成本，高回報，最終賺得多過明星絕對唔出奇。而呢件事係反映即使而家資訊咁發達，好多人嘅思想仍然未與時並進。
第二：經濟轉差。相比好多潮流KOL，合作嘅係大大小小時裝甚至奢侈品牌；小斯接job嘅範疇可以話係比較窄，主要做旅遊同信用卡，表面上水喉好似冇咁大，但其實品牌大多時都係好睇唔好食。聽公關朋友講過，好多時啲大品牌請明星/KOL去活動甚至唔俾錢，係咁意俾支香水版就算，仲要要求你喺社交平台出post多謝佢哋。而信用卡其實即係借貸，以今時今日嘅經濟環境，先至可能係最出得起錢。呢個邏輯其實同兩餸飯打贏米芝蓮餐廳一樣。
當然，好多人都指出，小斯唔單止係一個KOL，仲係一個成功嘅創業家，綽號「卡界呂布」。唔係擺下甫士影下相就收錢，佢嘅內容係有分析、有營養，先可以令全港絕大部分嘅信用卡宣傳都搵佢，聽講出篇文要六位數，可以話係一級宣傳平台 。
所以小斯買過億豪宅呢件事，其實係話俾我哋聽：可能馬已死，但佢未認命咁落地行。而外界嘅反應就係反映緊經濟幾差而仲有好多想法過時嘅人。究竟呢件事係勵志，定係突顯社會反智？