MIRROR踏入8周年，喺商場搞簽名會，鏡粉照樣熱情應援。但同往年一片熱鬧氣氛有少少唔同，今年好似由周年慶祝變成倒數活動，有種離別感慢慢滲出嚟。
多位成員喺簽名會分享成軍8年感受時，不約而同提到「珍惜」。姜濤話：「唔敢講下個10年係咪仲係呢隊人，希望大家珍惜當下每一個moment。」Anson Lo更講到，希望大家珍惜未來有限嘅齊人聚會，「當每一次聚埋嘅時候都係最後一次。」Edan又話，希望大家珍惜未來每一次工作同活動，留低更多美好回憶。唔少鏡粉聽完都覺得好欷歔，覺得解散之日不遠矣。
事實上，MIRROR合約年期從來都唔係秘密，大家對呢一日早有心理準備，有人甚至好似幾期待。《全民造星》出道到依家，MIRROR經歷好多轉變，由以前12個男仔一齊追夢，到慢慢有各自發展──有人拍電影、拍劇、唱作，粉絲亦由團粉走向追唔同嘅成員，對街客嚟講，近年對個別成員印象深刻過對MIRROR本身。對部分粉絲甚至開始覺得，不如各自以最好狀態發展會更加好。
不過呢個大家有共識嘅事實，由鏡仔親口講，好多人又似乎唔太接受到。有人希望MIRROR唔好解散，以另一種形式延續關係，間中合體表演。咁多年來，香港嘅組合大多都係到某個位，各自發展比較多。放眼海外，組合嘅結局就好似有更多不同方向，有正式宣布拆夥，有以「休團」名義各自發展，亦有韓團以「有限期團體」模式經營，出道當日就知道幾時完結。
未來MIRROR會以咩形式存在冇人知，但大家曾經一齊見證過呢12個年輕人最燦爛嘅歲月。我相信無論如何，MIRROR留低嘅，唔單止係歌曲同表演，亦有屬於大家共同擁有嘅回憶。
