謝霆鋒同容祖兒獲邀加入英皇娛樂嘅董事局,有人估計同集團近年嘅財務壓力有關,用天王天后去穩定市場信心。公司冇上市,冇咩公開資料判斷呢個決定嘅經濟價值,不過,藝人願意加入董事局,確實令市場覺得佢哋願意同公司發展共同進退,對公司形象有一定正面作用。
放眼海外,藝人加入董事局一啲都唔罕見,南韓同歐美都有娛樂公司邀請過藝人參與董事會決策。娛樂產業同一般企業有啲唔同,最重要嘅資產唔係機器或者物業,而係內容、品牌同觀眾。藝人每日同粉絲接觸,往往比管理層更早掌握觀眾口味轉變同市場趨勢,可以為公司發展帶來新思維。
用另一個角度睇,藝人入董事局可以令佢哋從一個更廣闊嘅角度理解公司運作。好多藝人十幾歲就入行,係人生第一份工。佢哋未必接觸過一般企業環境,對財務管理、人事安排、甚至風險控制嘅認識都唔多,不時都會有藝人抱怨公司偏心、資源分配唔公平,或者覺得管理層唔重視自己。相反,亦不時聽到公司管理層嘅怨氣,覺得藝人往往只睇到自己,唔明白公司背後要面對嘅壓力,宣傳計劃、演唱會、劇集嘅資源被削減、未必係唔支持某位藝人,而係公司要考慮整體收支同其他項目嘅優先次序。
管理層需要喺新人同前輩、本地同海外市場、短期收入同長遠發展之間作出取捨,仲要向股東、合作夥伴同員工交代。當藝人有機會走入董事局,接觸下咩叫預算規劃、業務策略同企業管治,有機會參與決策核心,自然更容易明白企業運作唔係淨係睇個人得失,而係要平衡好多持份者利益,減少「公司話藝人唔明公司」、「藝人話公司唔明自己」嘅矛盾。呢種視野同體會,對公司長遠管理來講,其實更加寶貴。
我覺得所有娛樂公司都可以考慮推廣啲體驗計劃。當藝人知道一個演唱會、一個代言、一個宣傳企劃背後要牽涉幾多部門協調,自然會更容易理解公司決策。
做董事令佢地更懂事。







