港版《悠長假期》未播先熱，預告片近日一出街，網上立即好多討論，有人話主角組合幾有新鮮感，值得期待；亦有人未睇已經批評一番，熱鬧到好似套劇已經開播一樣。
其實早喺ViuTV宣布會翻拍《悠長假期》時，爭議已經開始。有人質疑選角，覺得呂爵安Edan同李佳芯Ali，不及日版嘅木村拓哉同山口智子；有人擔心翻拍只係借經典名堂吸引觀眾，最終會破壞集體回憶。本來預告片出街後，再引起討輪就唔係咩出奇嘅事，不過呢一轉批評似乎有啲脫離現實，包括話對白太夾硬，但明明係原版嘅經典金句；彈琴嘅戲份話要搵個好啲嘅代彈，但明明主角Edan本身就係八級鋼琴，而且全劇「真彈」冇用配音；仲有人話冇咗沙灘談情情節，但明明就原版都冇；凡此種種，分幾鐘預告片，有人就好似睇晒成套劇咁，仲「未播先判」，斷定係失敗之作。
網上充斥住毫無根據嘅評論，有人就陰謀論，質疑係有打手帶風向，我唔敢妄下定論，畢竟網上咩言論都有，邊啲係真心意見，邊啲係另有意圖，實在難以判斷。我只知道，最後都係要用作品說話。好似TVB套《新聞女王》開播前被人睇死係現代版宮廷鬥氣老土劇情，點知成功幫TVB轉虧為盈，仲將會拍第三季；而HOY TV處境劇《你的保安李寶安》，播出前一片好評，令人期待；真正開播後，口碑同討論就有啲落差，有種高開低收嘅感覺。
宣傳聲勢幾大，始終都要播出後先見真章；未播先讚，唔代表一定好睇，未播先踩，亦唔代表作品冇可取之處。港版《悠長假期》能否交出成績，等播出後再評價都未遲。期待唔使盲目，批評亦唔使咁急，俾作品一個機會，都俾香港嘅電視行業生存希望。
