東感台北合體之訪問田蕊妮

動筆一刻，正身處台北酒店房裏，面朝工作枱，望着電腦屏幕顯示的時間，不斷拍打鍵盤 ── 今天終於放晴了，很想快點交稿予編輯大人，然後馬上到處走走。

對上一次來到這個城市已是2020年1月，誰會想到那次假期結束後，竟然要相隔四年才能夠回到這裏？有得放假，理應高興才是，但大概實在離開太久，有很多事情都變了(誠品敦南店和信義店關門大吉了，就連全家FamilyMart的開門鈴聲也更改了)。也可能是在香港工作太過忙碌，身心徹底忙壞，從桃園機場乘搭機場捷運前往台北車站開始，就一直覺得心神恍惚，完全不在狀態，環顧四周後自言自語自問自答：「怎麼眼前的台北，跟記憶中的感覺如此不同？」「是但啦，太攰喇，除咗瞓覺，咩都唔想做！」結果入住第一晚，竟然沒有外出自製「夜繽紛」，反而吃過好吃火鍋後，直接返回酒店休息，繼而凌晨一時就睡着了，作為「日出而息俱樂部」的VIP，只能講句大癲！

花錢買機票飛往異鄉瞓覺，乍聽太奢侈，然而香港生活太高壓，就算有得放假休息，兼且好運到沒碰到樓上樓下有單位因為裝修鑽牆鑿地，也不代表能夠「叉滿電」，甚至會有「漏電」情況。所以朋友都勸我切勿feel guilty：「瞓覺都係節目嚟，放假就係要咁！」

坦白講，天秤座極為愛懶貪睡，不過又有一種自我約束的能力，經常提醒自己：「有得做就做！」或者「有得做點解唔做？」所以一如去年的倫敦假期那樣，今趟在台北也有些臨時落實的工作，包括剛於周三(1月10日)深夜完成的《東感拉闊》直播。2021年年初疫情期間，因為在Clubhouse「圍爐傾偈」(還記得這個曾經風靡一時的語音聊天社交軟件嗎)，而認識了已移居台北、曾經在香港電台和無綫電視任職的資深節目主持「阿感」黎國輝。可能是星座的關係吧(他是雙魚座)，加上年齡相近(相差一年)，彼此很聊得來，過了沒多久，就決定在Clubhouse開咪，後製成Podcast節目《娛樂導賞精華團》。去到2022年6月中旬，乘《全民造星V》的熱潮，開設另一個節目《東感拉闊》，訪問不同藝人和組合。話都冇咁快，我倆如此這樣兩地連線開咪經已開足三年，奇就奇在，做了過百集節目，二人從來沒有「同框」。

直至出發往台北前幾天，收到阿感的短訊：「我約咗阿田做訪問！」於是我問：「幾時？」他說：「下星期。」再問：「點樣做？我哋兩個一齊？」他再答：「禮拜三佢錄完《杜氏閒情》之後就喺屋企，佢話11點、11點半都OK，暫定呢個時間，你O唔OK？」他似乎已忘記了我會飛去台北這件事。我說：「既然我喺台北，你又喺台北，佢又喺台北，三個都喺台北，點解唔一齊開live？」於是乎，簡單幾句話，再加上阿感在背後的一番協調，總算成就了這次「東感世紀同框」。加上阿田俾面「化(妝)到靚靚」又「着到靚靚」出席之餘，又有問必答，講下笑下，最後大家傾到差不多快凌晨一時才結束。

談些甚麼？重點當然是阿田身兼監製和主持兩職的「喱騷」全新節目《港女萬歲》了，第一集已於本周一(1月8日)旗下YouTube頻道足本免費播放。問到當初何以會構思這個節目，阿田坦言，所有事情緣於去年6月完成舞台劇《大離婚日─妻》的演出後，她感到極度疲倦，甚麼事情也不想做，也沒有力去做，但漸漸開始有自我質疑的想法：「做完個舞台劇，好攰，真係好攰，點解要講呢個呢？因為呢個節目，係嗰個舞台劇(衍)生出嚟。我係攰到呢，我老公(杜汶澤)直情提議過不如去旅行啦，但我係連玩嘅力都冇，即係攰到咁啊做完個騷。」

就算從香港返回台灣，依然未有改善。「跟住我返嚟台灣，直情我係想攤喺張床度，乜嘢都唔做，跟住個腦係空㗎，個人好唔productive……好似個人得返個軀殼，冇咗個靈魂。」阿田一向勤力到爆，奈何遇上「騷後抑鬱」，而且持續了一段時間，令她有種不知身在天地何處的感覺，「我就喺度諗，死啦，點解我諗唔到嘢嘅呢？死啦，點解我好似好冇效率咁樣嘅呢個人……個人好想做啲嘢，但我真係諗唔到。咁我老公就話：不如咁啦，我開個節目俾你，你去講女性嘅嘢啦，你好啱做！」經過一輪內心掙扎，在阿澤和節目團隊的協助下，這個「港女圍埋一齊傾」的節目總算順利開拍。阿田雖然入行多年，閱人無數，但她也笑稱：「呢個節目真係刷新我三觀！」到底背後發生哪些有趣事、爆笑事、震撼事？就要去到網上重溫今次訪問找答案了。