藝名ANSONBEAN的新人歌手陳毅燊，終於頂唔住要按下pause掣。
最近有人發現他清空IG，好快更有傳他退出娛樂圈。最後他在群組裡面解畫，無驚爆劇情、無氣氛渲染，只是淡淡然話：「因為心理健康同精神狀態，需要失蹤一段時間。知道咁樣係有啲不負責任，但希望大家明白。」並續指：「希望喺一個更好嘅狀態可以同大家再見，我亦都會記住大家。」這番說話真是真誠得令人肉赤。
字裡行間你完全感受到他不是想偷懶call一日半日sick，而是身心俱疲。最陰功是他同大家講「我唔掂」的時候，都要鞭兩下自己，覺得自己不負責任，對他人有份歉意。
ANSONBEAN絕非冇料之人，《全民造星III》季軍，舞功高強，有樣有肌，仲可以唱到兩咀，但對於這個行業來講，好可能仲未夠。今時今日這個圈子，是一個不容許你慢下來的世界，只要你social media不post東西，別人就會當你certified。現在做偶像不只做藝人唱歌跳舞，仲要做演算法奴隸，做隨時嘔到content出來的人肉生成器。好記得ANSONBEAN上年講過：「放低個電話一陣就會損失好多粉絲。」他從來不是對自己的工作不上心，而是不想再被like數、view數控制生活。他試過刪除IG，就是為了逃離這種無止境的追逐。
不過，並不是個個都有足夠良好的心地去諒解ANSONBEAN的決定。他一宣布暫退，即出現大量mean爆留言，更有笑他不夠紅「退唔退出冇影響，聽都未聽過」、「乜水」，亦有人笑他後生仔唔捱得，而這些冷嘲熱諷，加上流量至上的生態正是玩殘一個又一個偶像的真正元兇。香港娛樂圈最弊，就是太多人不容許偶像唞啖氣做返個人，時時刻刻都要正能量，每分每秒都要有新動向先對得住自己，對得住公司，對得住觀眾。
ANSONBEAN不是近期唯一一個大嗌暫停的歌手。2023年開完紅館騷後，鄭欣宜神隱兩年，清晒社交平台，絕跡江湖。這段時間有人偶遇過她並問她幾時復出，她只是笑著說「俾啲時間我」。欣宜拎過無數獎項，人氣見過高峰，實力毋庸置疑，但當覺得不妥，她選擇了收埋自己好好休息。她不是不敬業、不愛唱歌，而是想自己變得舒服，可以有一個喘息的時間和空間。藝人應該有權講「我唔掂」，觀眾應該識得將心比己。你每日都會攰，都會不想應機、不想扮開心，點解去到偶像，就唔容得人唞？見攰就唞，唔掂就講——呢句說話，不只是你自己獨享，做藝人、做偶像都應該有份share。撐唔住唔緊要，唔死撐都唔代表你輸。你不需要解釋，別人只需要尊重。