《我要初戀呀》
韓國戀愛真人騷早就進入了大爆炸時期：有賣腹肌火辣的《單身即地獄》，有賣前度修羅場的《換乘戀愛》，甚至連「親生兄妹」都可以拎來做主題，款式多過九大簋，底蘊始終是同一條公式，戀綜疲勞愈滾愈大。或者是聽到觀眾日日好似《喜劇之王》龍少一樣叫「我要初戀呀」，Netflix就炮製出一碗清新回魂湯——《母胎單身戀愛大作戰》，等你醒一醒神。
起初我都懷疑：「廿幾歲從來未拍拖？會唔會太誇張？」結果睇了一陣就知咩料，十秒一尷尬，三分鐘一出事，笑點不靠剪接，參加者本身就自帶喜感。一班男仔眈天望地多過正眼看人，滾軸溜冰約會寧願一個人兜圈苦練，都不敢去扶一下同行的女仔，真心又pure又true，仲帶有幾分笨拙，搞到觀眾一邊笑，一邊想伸手幫他們一把。
不過，全場唯一MVP，還是任職國防產業研究員的27歲仔金相昊。
從來未見過戀綜參加者可以如此佛系：聚餐搵位不考慮心儀異性坐邊，竟然是睇風扇是否夠近；沒有人揀他去約會，他就索性煮麵補眠自得其樂；對住女神級別、貌似具惠善的姜志受都是長期面無表情，對方俾晒位你入還是不打蛇隨棍上，完全演繹了何謂「憑實力單身」。
直到第4集，日語導師金美志一出場，這位慢熱男終於reboot。之前靜到好似入試場考DSE，現在卻變了開籠雀，知道傾偈時有時要主動，懂得對方說話時俾反應，識得笑同令對方笑——你就會明白，他根本不是不懂得拍拖，而是不想對牛彈琴，遇到啱key的對象，先啟動到開口機制。
觀眾笑這班參加者夠晒「I人」的時候，其實是笑緊自己：約會前緊張、社交場合想摺埋一邊、心裏掙扎住「講呢句定講嗰句」。節目最聰明之處，就係將「戀愛無能」變成療癒體驗，見到參加者跌跌撞撞，不單止會笑住同情，仲會代入「原來大家都咁廢」，記起自己第一次約會的遲疑，或者幾多次錯過開口的機會，而忍不住為他們打氣。《母胎單身戀愛大作戰》表面上是gimmick，搵一班零戀愛經驗的人落場切磋，逼他們尷尷尬尬地發展感情，但睇到中段就會發現它不止搞噱頭，因為它呈現的就同一般人在現實世界求愛差不多，拍的是現代人心入面對愛情既想像與恐懼。
至於同時期播的TVB《女神配對計劃》就呈現出另一種美學：靚女藝人任你追，觀眾睇的是一場精緻的final fantasy。兩套節目路線南轅北轍，但都是告訴你一樣東西：戀綜發展去到這個階段，冇gimmick就冇觀眾開始睇，冇真誠就留不住觀眾繼續睇。好睇的戀綜，就是讓觀眾觀照到自己的過去、現在和未來。這碗戀綜回魂湯，認真煲出誠意，亦應該啱好多人口味。