魯庭暉逆市轉會，消息及市場反應傳得快過暴雨警告。魯生離開工作咗15年嘅Viu TV同Makerville，消息一出引來好多揣測。有人估佢轉去另外兩間免費電視台，亦有報道形容佢係「黯然」離開。
不足一日，全球三大音樂集團之一的華納公布，魯生將會出任亞太區總裁，相信都係少數華人可以做到呢個位，網上隨即一片喜氣洋洋。我都戥魯生開心，唔只因為佢說好香港故事，港隊都有機會踢英超，更重要嘅係衝破大家嘅想像，高層離職唔一定係被炒魷，電視台高層離職亦都唔一定係過隔籬台，大家唔好再被「mean」限制想像，諗嘢其實可以正面啲。
網上有好多祝福，同時都有好多想像，例如魯生轉會其實係為MIRROR約滿後轉會鋪路，我未有機會問魯生係咪超前部署，不過有以下三點分析。
1) MIRROR最少仲有三年合約，唔少成員都話同公司關係好，佢哋尚且未諗轉會問題，會唔會有人為咗咁而三年前為他人鋪路？
2) 魯生新工係亞太區總裁，香港確係佢要睇嘅市場，但成個大中華、日韓、甚至去到澳洲嘅地區CEO都係向佢報告，角色唔係做前線決策，而係宏觀策劃。相信佢唔會得閒去睇簽唔簽邊個，而係聚焦點樣幫公司合作嘅歌手，探索更多嘅發展機會同市場。
3) 樂壇從來都唔係同公司先會合作，打工仔深明冷河期對大公司幾咁重要，觀乎魯生轉會幾乎無縫交接，相信同舊公司關係仍非常之好；加上MIRROR由個名開始已經係佢參與其中，佢亦曾分享同不同成員嘅小故事，相信即使唔再係同事，愛仍能延續下去，同公司同班仔都有好嘅關係，就可以有好多可能性。
有網民笑魯生比MIRROR更早做亞洲第一。睇返華納嘅新聞稿引述魯生話，希望喺新崗位「help more Asian artists hit the global stage」，證明佢初心不變。在此祝願魯生早日達成理想，香港歌手上美國Billboard，真心的栽種最後有好結果。