MIRROR成員邱士縉(Stanley)喺峇里舉行婚禮，成為團內首位結婚成員。一件開心喜事，外界焦點卻落喺冇出席嘅幾位成員身上，質疑冇團魂。我覺得咁對成件事實在有欠全面，想同大家分享以下3點。
首先，Stanley同太太Alina都係跳舞出身，聽講現場過百名賓客，大多起碼係半個娛樂圈人，但非官方流出嘅照片同影片相對算少，證明現場賓客大多數都尊重新人意願，保持到儀式相當私密，去得嘅都係真朋友。
其次，出席賓客除咗MIRROR隊友，仲有新舊老闆、唔少娛樂圈前輩、音樂人同舞蹈界朋友，反映Stanley嘅事業發展幾成熟，由偶像男團到演員，唔同界別同輩份嘅工作夥伴都出席恭賀，某程度上反映藝人成熟嘅歷程，亦係事業成長同進步嘅象徵。
之後，都要講返大家最關心嘅，就係鏡仔唔齊人出席。主人家Stanley婚後已經解畫，冇到場嘅兄弟係因為工作關係未能抽身，但有送上賀禮同祝福。網上有一種講法，覺得「大細仔組」已經決裂；我唔會話佢哋12個都好好兄弟，極好感情，我覺得兩種極端說法都係唔準確。
老實講，飛去峇里島參加婚禮，的確要有相當唔錯嘅交情先會特登放低所有工作，騰出時間，但唔去亦唔係等於反面，中間仲有好大空間。現實世界入面，即使公司同事都一定有遠近親疏。我覺得最客觀嘅描述可能係，MIRROR入面有幾對真兄弟，同時整體上亦存在好正常嘅同事關係。對部分粉絲嚟講，呢個答案未必夠浪漫，甚至幻想破滅，但其實完全合理。大家做到互相尊重、合作愉快，已經係一段成熟而健康嘅關係，冇必要無限放大成為仇人或者決裂。
平心而論，即使今次婚禮真係十二子全員到齊，網民又係唔係覺得佢哋感情好深厚，好有團魂呢？婚禮始終係私人場合，MIRROR作為男團，真正展現團魂嘅地方永遠都係舞台。12月演唱會相信先係大家真正見證團魂嘅時刻。
