我唔係兩岸專家，本報另一位專欄作家夫子(劉銳紹）先係。不過，唔知點解畀人拉去參加一個訪問團去台北，聽下同兩岸事務單位之說法。兩岸事務之一姐係Small Moon，親切啲啦。咁究竟佢講咩？不妨用寫新聞寫作模式同大家講下：
「在台灣，陸委會主委張小月與香港時事評論員(家）代表團會面時表示，希望能夠與北京進行正式會面。
張小月昨日(12月20日)與代表團會面時指出，在去年「五二零」蔡英文總統就職之後，兩岸所有官方的接觸已經停止。蔡英文政府兩岸政策的重點，是要保持和平穩定。在此一年多的時間，台海關係都是穩定的。她表示，現在因應世界形勢的轉變，加上中共十九大已經完成，她認為兩岸應該盡早坐下來談，找到一個互動的新模式。
被問到台灣會否接受現時兩岸的現狀(status quo)的時候，張小月重申，北京提出的「一中」原則，是不可以接受的，但台灣方面不會主動挑釁，也不會衝撞的。她希望雙方盡量有善意及彈性，「不能一定要(台灣)接受前提，雙方才坐下談。」
她提到，過往雙方簽署了21項協議，至今仍然有效執行，而在一些生活的議題上，雙方可以談的生活性議題，包括源頭來自中國導致台灣空氣污染的問題，廈門飄往台灣的垃圾問題，以及來自台灣的外國電話詐騙犯押回中國大陸的問題等。」
當然有咩微言大義呢？問道於高人A。
高人A穿梭兩岸二十幾年。佢話，基本上北京度閘關晒，佢仲咬牙切齒話，呢一屆English Choi政府，北京都唔會同佢地傾。呢啲政治立場嘅嘢，北京好硬淨，絕對唔會畀空間English Choi。
我見咁好機會，問埋高人A點解北方要咁硬呢？
佢講咗一個情況：今時唔同往日。上面依家之官僚，係技術官僚，佢地唔會唔知道，強硬手段中長期可能會有反效果㗎。問題係，上面依家嘅思維係，總之唔好響我任期之內，出現任何亂子，於是就高壓維穩，一定say no。未來嘅嘢，就留番未來去解決。唔關我事矣。
佢又反問我：究竟Small Moon嘅決策體系，係知定係唔知呢個情況呢？如果係唔知而講要面對面，咁就真係幾搞笑啦，係未？但係如果Small Moon嘅決策體系確係知道嘅，咁又點解勞師動眾叫你地嚟我地地頭度講呢番話呢？咁呢番話係講畀你地香港人知道吖，定係講畀北京嗰邊聽吖？定係講畀島內人民聽，佢地響度做緊嘢呢？
我好強調，我唔係兩岸專家，聽完係唔識反應。我只係問高人A，頭先講到，上面對台好硬淨，對港又係點呢？
高人A笑曰：一樣的。對你地未來會仲高壓，睇吓你班人聽唔聽話！響強國邊個決定要用呢種高壓政策？你話呢？大家明啦。
灰爆未？都係繼續睇《風暴3》人夫阿Nic算啦！