Ad Block Ad Block
新聞
2017-09-01 06:00:00

兩億啫

分享:

開學之前,同大學老師傾開,無論老餅同後生,都大嘆十聲。一個後生仔,唔知點解咁睇唔開,居然響應特區領袖們偉大號召,北上讀博。唉!我有啲後悔無截住佢。讀完之後,港人身份,冇人冇物冇Quanxi,上面讀完博,響依家強國連烏魯木齊大學都要海歸博士教書嘅時候,真係強國冇工開,香江八大,崇洋不崇中,就更加唔會請啦,於是就響各大專界別遊走教書等開飯。


我話:你北上讀博之前,真係冇想清楚,除非你係全球知名之醫生或科學家,依家強國博士一年幾千個,點去爭教席呢?就算畀你響強國大學搵到份工,土炮博士都係先做講師,基本工資一皮幾,又冇其他省級或國家級項目經費支援,靠份底薪,唔通同本科生一齊食頹飯咩?港人身份,要加入強國學術團隊申請項目,難過登天,因為Quanxi唔夠,點樣去搶項目呀?係人都知,強國拿科研,Quanxi仲要過實力。而響香江呢?當八大都唔係好願請土炮博士做全職之時,你呢啲強國博士,英語能力又唔知可唔可以寫到三星至四星之論文,好難爭贏鬼子佬囉!


現實就係咁樣。香江土炮大學,十幾二十年前開始,強調排名,於是唔理好醜,洋人博士往往有著數。撞啱西方大學冇水,於是洋博士紛紛外流。香江大學,真係全球極少數之大學,咁唔尊重同培養土炮博士同學者,於是呢,一班土炮博士,好多變成流浪老師,四處打短期合約工搵食。一個學期教三至四科,教到氣咳。教完書已經半死,仲要寫研究論文,否則真係全職教席都未必搵到。


全行都知,依家好多大學之教學工作,都係講師去做,而且流動性又高,今日唔知聽日事,士氣當然麻麻。但係,整個大學之氛圍,就係拼排名,搞業績,唔係好理呢啲基層員工之生計。好多呢啲講師,都係青年有為,三十零歲,學識高過晒依家香江之高官,好啦,人工就差天共地,北上人工更低更冇機會,佢地之憤怒,究竟可以點處理呢?


所以早輪我提過,政府可以響五十億嘅新教育開支裡面,用兩億去畀八大,開四百個長期之全職講師職位,頂住先,等呢班青年都有個希望。不過,你知啦,我呢啲學棍型老師,又唔係乜嘢社會賢達,冇人脈冇飛士,政府點會理吖?聽聞,我地教育界議員葉sir真係有同政府傾過。不過相關人士就答:院校自主,唔可以理得到。
都啱嘅,政府唔想理果陣,就會用院校自主(針對大學)或者校本管理(針對中小學)理由推晒唔走。到咗要理嗰陣,就係善用公帑,支持教育。冇所謂啦,青年學者之憤怒,都唔緊要嘅,咪由得佢地囉,係未?有人問,點解依家咁多高教界青年學者,連強國畢業之博士們,都同依家政府過唔去。你話呢?

Ad Block


 

請接受以下私隱政策及免責聲明,以示你同意am730內之私隱政策及免責聲明。了解更多
接受