我一向好怕出席研討會做講者，一來學術上沒有成就，學棍一名，出席研討會即係害人。二來，身份尷尬，研討會係搵學者出席，往往要有學術名銜(似三合會「撻朵」一樣)同掛單之學院，無嘅話，即係無主孤魂。呢類人，一係就係世外高人，學術泰斗，深山練功，何需呢味嘢傍身？一係就係屎到無倫，學術烏鼠，水平太差，間間學院避之則吉。好明顯，我似後者多啲。
由於係咁，響研討會撞到最近震驚學界之教授，亦係當年大學老師，居然出席，感到驚訝。老師素來溫文敦厚，深耕學問，最近忽然出來呼籲「佔領中環」，振臂一呼，見之譁然。老師忽然仲激過長毛，點解一個斯文學者要站出來搞公民抗命？
親北京人士其實忘記咗一件事。兩年前傾民主發展方案嗰陣，部分泛民學者同埋溫和民主派搞咗個組織，同政府展開談判。政治判斷呢味嘢，無話對錯，道不同不相為謀，你有你公投，我有我談判，大家睇成果之嘛。傾嘅過程，唔容易。聽聞當時仲有人飛咗去北方同人傾，傾到不歡而散，而上面負責溝通嗰個，風水輪流轉，依家就駐響西環。
唔知Hello Kitty領袖，又知唔知呢啲舊事呢？假如知道嘅話，佢搵個同泛民有仇嘅人做副局長，即係擺明要同西環過唔去，用北京常用語，就係搞局。假如唔知的話，佢搵人哋仇人出來做副局長，就即係代表咗，佢響北京心目中，地位有限，收風都唔識收，仲要話同泛民係敵我矛盾，聽完都O咀也。
言歸正傳。經過政改之後，有部分泛民朋友以為，可以借此同北京，建立一套比較穩定的互動模式。不過，後來政改方案通過之後，北京度門又閂番，而且仲變本加厲，要同泛民決一死戰，借機打死溫和泛民，響選舉嗰陣，最大力打擊嘅對象，就係溫和民主派。坦白講，北京打到佢哋雞毛鴨血，立法會幾乎一鋪清袋，一班泛民學者睇完之後，會有乜嘢反應呢？會覺得意興闌珊，無心再同北京纏鬥呢？
響呢個背景之下，有學者企出來，提出佔領中環的行動構思，不是無因，而係因應北京對港政策愈左愈窄，說話唔算數的自然反應。過往，京官認為，香港學者得把口，唔會出來搞運動，所以一於無有怕。但係，今次已經唔同，佢哋發覺，再係咁樣俾北京或其代理人亂搞，唔係辦法，不如就出來同北京博一鋪！
北京唔係唔知道出咗事，而確實2016立會改革，而2017年特首普選戰又起，依家要做定工作。所以最近官方《至驚》出咗篇怪文，似乎要向泛民伸出友誼之手？唔係嘛，俾人打完一身又試呵番？唔通泛民有被虐癖？（二之一）