板塊碰撞
2020-05-22
news-images
美國總統特朗普

兩個大板塊碰撞時,就會有地殼震動,咁就震到人仰馬翻。外國有評論話,侵侵俾病毒震完之後,首要係將病毒肆虐嘅責任,轉移俾北大人。但係,呢位評論家話,侵侵嘅奸計,好大機會得逞,而且會得到美帝選民嘅支持,因為美帝人民唔係蠢得晒,佢地知道侵侵係衰人,但係,呢一刻需要侵侵呢啲衰人去幫佢地出氣。而且,侵侵一樣會用返四年前嘅選舉手段:吹牛、屈人、信口開河、亂講大話來谷高個支持度,以至於最後贏得連任。當然,佢無提到,侵侵仲有軍隊響手,可以點打都得,係未?

呢個係一個老問題:民主黨仲係相信,美帝選民係要一個decent嘅總統,仲係需要一個講理性講包容講普世價值嘅領導。我地呢啲局外人,反而係睇到,支持侵侵發惡亂搞嘅選民,可能仲係主流。佢地容忍侵侵響度,係因為如果回歸舊體制,又係嗰班搵大錢嘅親民主黨嘅商家佬話事,窮人更加冇運行。講到呢度,已經有支持美帝民主黨嘅評論撥冷水,認為依家拜登響民調上贏過侵侵幾個百分點,根本贏唔到侵侵,言下之意,即係要美帝人民,以至世界各國,忍多侵侵四年。

侵侵四年,橫衝直撞,但有一樣嘢佢係無呃到支持者嘅,就係佢冇派兵,去開啟一場新嘅戰役。佢有射飛彈去敘利亞,佢係有先高調減人後靜靜雞加返人手響伊拉克、阿富汗,但就冇打一場新嘅戰事。侵侵先減軍人後加軍事顧問指導人地國家嘅軍隊,係未技術上冇增兵呢?咁都係口同鼻拗而已。但係,咁唔代表侵侵唔會開啟新戰事。好簡單啫:如果依家侵侵同拜登叮噹馬頭,而打一場小型戰事有利侵侵連任,你覺得侵侵會唔會博一鋪呢?前總統卡特競選連任時,就有一次軍事行動,去營救俾伊朗挾持嘅,響德黑蘭嘅美帝使館人員。不過,呢場行動失敗咗,卡特連選舉都輸埋。大家就要估下,按侵侵性格,會唔會為了連任,而走去打一場交,博一鋪翻身呢?幾時疫情會完結?對某些政客來講,完結就係噩夢的開始,即係追究政府辦事不力的開始。隨住英帝嘅疫情穩定,評論開始問責波叔,特別係三月嘅封關前兩個星期,點解明知有疫情,仲係懶懶閒呢?嗰兩個星期響度搞邊科?近日Ryan Air高調反對波叔,因為波叔內閣想推出國際旅客入境隔離十四日嘅措施。

如果有水晶球,由一月至今,日日都係關鍵日,封關越早越好。英帝輕視疫情,係因為有大財團反對封關,驚影響經濟。病毒表面上冇分貴賤,但有錢佬確實影響最小。因為除咗佢地可以飛來飛去,去嗰啲遠離病毒嘅地區指揮若定之後,佢地屋企夠大,社交距離要幾遠幾闊都得,口罩要幾多有幾多,邊會有事?

Ranking
See All
See All
See All
See All

隱私權保護政策

請細閱並示意接受以下私隱政策及免責聲明,按下「接受」表示你已同意並願意接受 am730 網站內之私隱政策及免責聲明。了解更多