當選高雄市長的韓國瑜。
台灣九合一大選之後，好睇過戲。高雄新市長Korean Fish，成個藍營救世主，藍營電視台跟到足。早兩日台灣麵包大師春哥因為畀強國網民話佢響上海新開嘅麵包店賣嘅係台獨麵包，發咗過聲明，講一大堆兩岸一家親之東西，畀台灣網民圍插。Korean Fish二話不說，即刻鏡頭面前撐佢。Korean Fish一出，暫時止住咳啦。至於Korean Fish就職嗰日，會唔會有「死敵」王世堅上台表演，未知噃？
八卦係台灣政治特色，但係嚴肅政治總係主流。綠營輸選舉，English Choi辭去黨主席，於是邊個做主席又係一輪廝殺，好多人都想拱陳其邁上去。查實English Choi輸選舉之死因，開始好多內部諍言浮面，總之原因多多。佢身邊之幕僚，據說叫做「文青幕僚」，即係吹水唔抹嘴，論述一大堆，做嘢個個水。仲有English Choi都係細緻管理之一姐，唔係好理下屬，最終意繞過下屬去指指點點云云。點都好，English Choi都係想連任。藍營對家，「一中各表」之創作人蘇起最近話，主宰下次總統大選嘅，係美帝因素。English Choi家陣親美，屬無可奈何選擇，但素來寶島總統選舉，傳統上要美帝「不反對」至得。下屆藍營出邊個？傳係吳敦義vs朱立倫，仲有個Golden Ping王金平響旁邊眉來眼去搵著數。出邊個都好，都要美帝放心至得，係未？
去去去，去美帝。泛民又去，建制又去。阿鼎又去，DK又去，國斌又去，唯有好打得冇去。上周二好打得好似變咗網絡酸民，一時話自己外訪十次，又話佢至有權威去外訪云云。講到咁勁，原來上周三至五，美帝商務部代表團來咗香江同相關部門開會。既然係咁，好打得使乜外訪，響地頭招呼佢就得啦，係未？不過，奇就奇在，呢單嘢響本周一由美帝駐港總領事館爆出來，事後好打得一句聲都冇講。喂！阿哥，美帝一直嘈緊香江公司，私底下做緊好多北韓同伊朗生意，美帝都爆過幾單，包括有香江之船隻，好似賭神咁樣，駛去公海做非法勾當，以為神不知鬼不覺。不過，話時話，有次捉到隻賣油畀北韓之香港油船，係台灣佬租嘅，點解美帝唔去高調追究台灣佬？
美帝響香江，大把牌可以打。香江之獅子銀行，次次都中。肥平畀美帝拉去收監，除咗部分傻佬，邊有人會撐佢？但佢衰邊瓣？就係搵獅子銀行將懷疑賄款電匯去紐約。仲有響加國果陣孟女事件，美帝話係獅子銀行唔理制裁伊朗禁令，又匯錢畀間公司做伊朗生意云云。次次出事都係獅子銀行，次次都畀美帝抓個正著，但次次唔見美帝扣留幾件獅銀行高層控以違反禁令咁得意？當然，獅子銀行已經畀美帝銀行罰到傻晒，依家你開間公司去獅子銀行開戶口，仲難過登頂珠穆朗馬峰。美帝乜都知，係幾時出招先至唔話你知！