出稿時間係年三十晚，祝大家新年快樂！放假前夕心情一早都係放鬆晒，但Game界就完全唔放鬆啦，因為各平台都玩超勁減價，特別如果讀者朋友平時都冇乜時間打機，好多game冇玩過嘅話，今次更值得留意。當中最得人驚係PSN，淨係會員即送《Bloodstained》同《Control》，兩隻都係不可多得嘅佳作！至於Switch就認真要推推《死亡細胞(Dead Cells)》完全版，話就話《死亡細胞》2017年已經上架，不過多年發展下，多個更新、DLC等，加上Roguelike玩法，不斷重玩幾百次都唔會悶，可以話從來冇過氣。今次呢個完全版，係包括全新嘅「FATAL FALLS」及以往多個DLC，特價都只係$153，以「半新半舊」嚟講最抵買，絕對係土下座私心推薦。另外私心再推兩隻SLG大作，《夢幻模擬戰I&II重製版》及《超級機器人大戰T》，同樣半價，而且遊戲時間極高，相當值得入手。而其他遊戲如《女神異聞錄5:亂戰》、《Overcooked 2》、《洛克人11》等等全部有折扣。對上一次令你放唔低部Switch嘅game可能已經係《動森》時，不妨又拎起返部Switch睇睇有咩買。