記唔記得，大家當初係幾時開始接觸「遊戲」？土下座由紅白機開始，大個仔少少就「偷雞」入機舖，再去到買PC-E、Neo-Geo、3DO、Wii、PS、Xbox等，幾乎每種遊戲機都有接觸過；然後近幾年又見證手遊點樣極速冒起，成為已經動搖到家用平台嘅最大勢力；到中國遊戲更因此取代日本成為指標，連最近Switch大作《Pokemon Unite》都係交由騰訊開發(將推出手機版)，有高低起伏，又有科技革新嘅魅力，所以遊戲業對土下座嚟講，可以話有好多好吸引嘅故事，亦因此不斷有新題材撰寫。由唔同嘅遊戲去做引子，再帶出背後嘅故事，係一直以嚟呢個專欄嘅風格，不過因為要兼顧個人工作，唔係每次都做得到，認真抱歉。本來今期內容，想同大家分享一款中國手遊，點樣由課金、「換皮」、賣IP外，再另闢新途徑贏玩家口碑，不過考慮到今期係最後一期，似乎唔應該特別用一隻遊戲去做題材(希望呢篇文唔會令編輯太難做)，所以都係就此收筆。最後，正式再講：《事必低頭》呢個專欄，今次將會係最後一期喇！從編輯口中得知，原來專欄點閱率一直唔差，所以想借少少位講兩句個人感受：「雖然土下座呢個身份始終係一個謎，亦冇機會同大家交流，但感謝讀者長期嘅支持同點閱，亦多謝《am730》老闆同咁多位編輯，有緣總會再見！」