即將踏入11月，亦同時倒數緊今年完結，去到最後2個月，遊戲界仍然唔願停，反而仲會令到好似土下座呢種時間有限嘅人非常煩惱，首先10月底即係明天(27日)，Ubisoft嘅《Assassin's Creed Origins》就會迎戰任天堂Switch嘅《Super Mario Odyssey》，兩隻都真係大作中嘅大作，幸好平台唔同，總算有少少生存空間，出街玩Switch時，屋企就玩到刺客，同時間唔啱動作game嘅都有大路作品《Call of Duty：WWII》，都係唔少人等咗好耐嘅大作，如果講fans專用，其實仲有《勇者鬥惡龍11追尋逝去的時光》亦會喺11月11日推出。講真，隻隻game都唔同類型性質，貪玩嘅gamer今次識分身都頭痕！但都絕對不能忘記，11月7日仲會有正式登場嘅新世代主機Xbox One X，淨係講機能都應該講得到年尾呀！