下一位波士炒邊個
今季英超列強整體水平嚴重失準，最後高潮竟落喺聯賽擺爛、但會喺歐霸生死決嘅曼聯同熱刺；加埋季初勁到可分三隊兵馬嘅車路士，歐協聯入決賽鬥貝迪斯，但其實更想係保住英超前五名踢返歐聯。英超強隊喺歐洲球壇霸氣不足，季尾預計再有領隊人頭落地；始終賴戰線多搞到成籮傷兵，以後再唔可能係下台階，各方為錢看，賽事只會越嚟越密，強隊投資大又交唔到合埋成績，塊遮醜布頂唔到太耐。
今屆英超暫時只得6位領隊中途被炒，全落喺現時排第13至20位嘅8支球隊之中，冇事只係熱刺普帥同葉士域治嘅麥堅拿。除咗李城嘅雲佬係被炒大熱、熱刺同車路士嘅主帥正正分列二、三熱門，證明就算嚟緊歐洲盃賽揚名，好多人唔睇好佢哋嘅前途。就算英超份工最長壽嘅曼城哥帥被炒亦唔係奇事，季中大肆擴軍博反彈，只見踢法仍然呆板，球員鬥心欠奉。一場預咗係攻防戰嘅英足盃，只見藍月又係老鼠拉龜，賽事水準低，隊內運作似滑晒牙，教咗就快9年嘅哥帥，仲又乜法寶捱過十年？