全部輸家
世冠盃近尾聲，球壇熱話回歸轉會市場，暫時有兩單矚目新聞都同維拉有關。數個月前，英超黑馬維拉有心染指歐聯同搶聯賽前列位置，既然得到沙特艾納斯喺冬窗用7,000萬英鎊搶佢哋哥倫比亞新星杜蘭；結果正好利用大筆資金借得PSG嘅前鋒阿辛斯奧同三獅射手福仔等攻擊好手加盟。可惜最終「雙失」來屆降格踢歐霸，兩大借將亦回歸屬地。維拉「冤枉嚟，瘟疫去」，今夏暫冇聽聞有任何重要收購。
嗰次冬窗大刁，半年後證明全部有關球會都係輸家。福仔垂頭返回曼聯冇埋件10號波衫；嗰份仲有3年合約嘅30萬英鎊周薪，除非自己肯屈服，唔係好多大會包括巴塞未必食得落，最後會唔會等到8月尾關窗前，紅魔夾返份波糧借走福仔費事眼冤？更大嘥當然係識得印銀紙嘅艾納斯，重金簽杜蘭諗住做C朗最強拍檔，結果唔夠半年就走人，準備借佢去摩佬領軍嘅土超費倫巴治，同球員嗰份超過30萬英鎊免稅周薪格格不入。當時上緊位嘅杜蘭如果肯留返喺英超，拍奧尼屈堅斯打雙箭頭，維拉食住個勢喺英超都幾惡。