世冠盃新星
仲夏美洲世冠盃，巴甲四支參賽隊先聲奪人，當中最矚目嘅彭美拉斯18歲新星艾斯迪斯奧，亦係巴西新帥安察諾堤，早前初點兵世盃外7位前鋒中，唯一入圍「土炮」，可見各方器重。佢打完呢個賽事，就會加盟一早簽佢嘅車路士打英超，臨別秋波依然賣力，心態抵讚；不只係速度飛快，個人盤扭技術上佳，但可能天氣熱耐戰力麻麻，去到極速英超，龍定蟲未知數。佢喺彭美拉斯嘅「師兄」，大佢唔夠1年嘅安迪歷，一年前重金加盟皇馬，上季全季喺西甲只入得1球，依家養緊傷；安迪歷靠上年跟大佢五年嘅模特兒女友結婚，喺銀河艦隊搶回一啲人氣，係咪造「星」成功，有待打磨。
巴甲球員據報周薪平均約6,000美元，少英超同西甲以10倍計，喺世冠盃呢類講鬥心多過計實力嘅大賽，唔好中暑爭冠軍都係最多踢7場；一眾當打美洲兵必乘機搏命揚名立萬，等球探賞識介紹去西歐掘金改變命運。保地花高贏到PSG，更強嘅彭美拉斯同法林明高，喺淘汰賽遇歐洲隊一路殺上去爭霸，一啲唔出奇。