古路施夫斯基(右)
強如哥迪奧拿早年教藍月到翌季先圓冠軍夢，紅軍嘅高普更要教到第5季先封王；兩隊經過多年磨練，踢法已行雲流水，有鋒無鋒也可以。現時喺英超另一位盃王干地，之前替祖記、車仔同國米攞過聯賽錦標，3個多月前接手救熱刺，如今蜜月期已過，熱刺經歷聯賽3連敗，睇唔出鍾情打「3-5-2」嘅干地有乜法寶幫隊波重上前4。
冬窗放得走大瘀血迪利阿里，但喺祖記買斷賓坦古亞同借得古路施夫斯基暫未見成效，二人出場3次合共0中框射門，唔通只係走走糴糴嘅工兵材料。自從「肥普」兩年多前替熱刺登上歐聯決賽高峰後，隊波明顯走低；中場靈魂基斯甸艾歷臣走後，只靠前鋒「孖寶」孫仔同哈利卡尼硬爆死撐。
干地理應帶嚟改革新希望，但意甲兵有幾高水準，仲要係祖記唔要嘅所謂烏拉圭同瑞典新星？連上屆意甲最勁嘅「魔獸」盧卡古，即係干地前國米封王猛將，今屆返英超回歸車仔都踢到發晒忟憎就知。剛戰輸俾狼隊排出嗰條中場線毫無創造力可言，干地開波廿多分鐘已知錯，唔知熱刺高層知唔知？