唔好以為淨係英超Big Six花費得起，沙特職水頭充足；今夏重磅轉會仲有「非洲天王」域陀奧森漢，正式由拿玻里過檔土超3連霸嘅加拉塔沙雷，6,500萬英鎊轉會費，個人除稅淨收25萬英鎊周薪，每年仲有忠誠獎賞同肖像權多收500萬英鎊，落戶土超做山寨王。
據著名網站Opta最新公布嘅權力排名榜，土超世界排20位，差過瑞典超，同西乙及德乙同分，英超排第一。呢個同土超一向係三強加拉塔沙雷、費倫巴治同比錫達斯鼎立有關，實力懸殊拖低評分，而前兩者全國球迷支持度合共已佔七成半。土超球迷瘋狂死忠，強隊周邊收入多，好似加拉塔薩雷最賺錢嘅資產，係擁有一塊佔地相當於112個標準球場嘅黃金地段房地產；加埋今屆直入歐聯分組賽最少執幾千萬英鎊，所以買得起奧森漢，吸引到德國翼鋒利萊辛尼加盟。不過實力懸殊到由蘇斯克查教嘅比錫達斯，一早喺歐霸外第二圈出局，要轉戰歐協聯外圍賽；而摩連奴領軍嘅費倫巴治，明晚作客硬撼荷甲飛燕諾，又睇下土超二哥登場，可唔可以升呢踢爭氣波。