紐尼斯海倫混合版
哥迪奧拿喺曼城世冠盃提早出局後講過，擔心世冠盃後缺乏休息，去到年尾就變球隊災難。吃唔到嘅葡萄係咪酸？只見車路士不停添兵注入朝氣同競爭力，全季踢咗64場波，愈踢愈起勁，8月先開操備戰英超新季都未驚過。賽事密度瘋狂已係球壇常態，只要唔停簽入優質小兵俾主帥試用，喺車仔高層眼中根本冇厭戰同易傷嘅藉口，何況佢哋手執哥帥當年放手嘅進攻王牌高爾彭馬。
車仔策略係漁翁撒網，有運簽到巨星當中jackpot。趁英超新季剛好仲有一個月就開波，列強會加快擴軍速度，怕車仔進一步坐大。其中車仔嘅倫敦勁敵阿仙奴空前積極，三線位置全力掃貨，當中最矚目當然係士砵亭入球機器基奧基尼斯，九成機會來投。外界擔心呢位早年仲踢緊英冠嘅北歐前鋒基奧基尼斯，會唔會喺紅軍葡超兵達雲紐尼斯二世，又或者曼聯北歐新星海倫嘅混合版前鋒水貨。其實現今頂級球壇根本已無長線操作可言，買貴就預咗，得唔得踢過至知，何況達sir嘅阿仙奴已5季未捧過重要獎盃，都係時候再押重注！